إلعب غيرها
’’’’’’’’’’’’’’’’’’’’’’’’’’
وعشان الكلمه ما تعدهاش
والقلب اللى ماعاد يتحمل
أنا ححذف صورتك من قلبى
وأواصل مشوارى وأكمل
وأن مره لقيتك تنادينى
أنا هعمل روحى مش سامع
وأن مره لقيتك قدامى
من شارع تانى هأكون راجع
راح أغمض عينى قوام دوغرى
وهغير تفكيرى وأراجع
وأن مره لقيتك جوايه
مع أول عطسه تكون طالع
وأن شفتك جوه ب شريانى
أنا هدبح روحى ب سكينه
علشان تتسرسب من دمى
غير دى العبه قديمه
لاتجينى تانى ولا أجيلك
ولا هشرب تانى من نيلك
ولا هسمع تانى أعزارك
ولا أشكى ل خالى ولا ل عمى
ولا حكى لحد من أصحابك
ولا هشكى من تانى لأمى
وهقطع صورك وكلامك
ما رحلت خلاص ورمتنى وراك
ومفكر أنى هترجاك
قال راجع تانى ب تتأسف
منا كنت أمبارح بتمناك
لملم أشلائك جمعها
يمكن من تانى تلاقى هناك
دور على حد يعيش جارك
ف مسلسل تانى يشوف دورك
يا اللى أنت قتلت الخير جواك
يا مقطع كل حبال الود
ماعدش القلب يقول بهواك
ولا عادلك صوره ف خيالى
غير شبح الماضى وكل أساك
وكتاب من شعر قديم جدا
أوراقه الدايبه مش فكراك
والورده اللى مابينا أنقطفت
ولا عدش باقى غير أشواك
الغلطه ف عمرى كانت حبك
وجزائى كان مرك وجفاك
’’’’’’’’’’’’’’’’’’’’’’’’’’
عبدالواحد محمد
إرسال تعليق