أمي
.
عارفة ليه باشتاق إليكي
و ابكي من بعدك حبيبتي
أيوة عايشة بس تايهة
شئ ناقصني هو إنتي
لما ألقى الكل عاوز
و افتكر كام مرة كنتي
توهبينا من سنينك
عاوزة دي عمرك ما قولتي
نبقى بنفكر في روحنا
ننسى نسأل حتى مالك
و إنتي بتداوي ف جروحنا
توهبي عمرك و مالك
تدعي و تهنّي ف فرحنا
و إحنا نقطف من جمالك
شلتي ياما يا أمه عنا
مين بقى ف الشدة شالك
آه يا ريتني مُت قبلك
آه يا غالية مشتقالك
لما بتعرض لشدة
و ابقى محتاجة لدعاكي
حضنك الطيب واحشني
نفسي يوم ارجع معاكي
نفسي أخدك جوا حضني
يبقى يوم قلبي رعاكي
يوم مفكرش ف مشاكلي
و اسألك نفسك ف إيه
تضحكي و تقولي تاكلي
و ألا شايك تشربيه
متخفيش بعت الغويشة
و اللي نفسك فيه هاتيه
بكرة هنكمّل جهازك
و الفرح مقدور عليه
كنتي ليا كل حاجة
بس مرضيش الزمان
فرحة القلب بسذاجة
جوا حضنك و الأمان
كله راح
و بكلمة واحدة
ماتت أمي
و هي ساجدة
أمي ماتت
كلمة صعبة
شلت الروح و اللسان
و الدموع فاضت يا غالية
و إنتي بتفارقي المكان
شوفت حاجتك بس باهتة
حضن فارغ م الحنان
إنتي فعلا موتي يا أمه
و إلا دا كابوس م الشيطان
كل حاجة واحشها حسك
حتى ريحتك ف الحيطان
لجل روحنا وهبتي نفسك
خدنا منك ياما ياما
و الوجع لو مرة مسّك
تدعي لينا بالسلامة
اتوجعتي ما حد حسك
بس حسينا بندامة
كنا لسه محتاجينك
مين عليه فينا الملامة
ياللي عايش جنب أمك
بوس إيديها كل يوم
يوم سعادتك لو تضمك
تنسى وجعك و الهموم
هي نعمة هي جنة
ادعي ربك لك تدوم
..
الام لولو
إرسال تعليق