نفسي اخبيك جوة
باترينة ازاز
وحدي اشوفك
ولا يلمحوك الناس
وكل لحظة ارقيك
من عيون قلبي
ومن عيوني انا
قبل عيون الناس
اعدي اسمي واصلي
واملس بايدي انا
وارجم ب آيات ربي
شيطان رجيم خناس
خايفة عليك اوي
من نظرة من عينهم
يحسدوا قلبي
ماهو قلبي كايدهم
ازاي يكون جواك
ويدق ويغيظهم
وازاي يفوز
بيك
وانت اللي شاغلهم
برأف بحالهم أنا
ماهو حالي كان
من حالهم
قبل اما اقرب انا
واخطفك منهم
انا نفسي
بستكترك
علي نفسي اولهم
نفسي انا اخطفك
واقفل عليك منهم
وافضل اسمي عليك
واوزع حصاوي
كتير في نن عين
عينهم
وعين كل اللي شافك
ومااسمي ولا صلي
تعيش حبيبي انا
وف حضني تتهني
وف قلبي دايم ليا
فرحتي وجنة
واوعاك تخاف من الناس
ولايوم تخاف م الحسد
ازاي اسيبك لهم
او حتي اسيبهم انا
يلمحوك لو غلط
بطرفة من عنيهم
انا قلبي هو الحمي
هسكنك جواه
بلاها باترينه ازاز
وبرج عالي بلاه
خليك ف قلبي انا
وياويله والف ويل
اللي يفكر يلمح
نظرتك ياحبيبي
يرحمه ربنا لو رحمه
من ايدي
هناء محمود...ام عبير
إرسال تعليق