منطقي وطبيعي جداً يفجرونا
يحاولوا دايماً يكسرونا
منطقي وطبيعي جداً
يحزنوا ويتغاظوا لما بيلاقونا
مسلم مسيحي ايد فإيد
منطقي وطبيعي جدا النار تقيد
والغل يجري جوه منهم
مجري الدم في عروقهم
منطقي وطبيعي جداً
يفكروا يهزمونا
يفجرونا ويكمموا افواه ابونا
منطقي وطبيعي جداً
يكرهوناو يعادونا
يفجروا احزان قلوبنا
تجري دموعنا علي خدودنا
اشلائنا تتبعتر هناك وهنا
منطقي وطبيعي جداً
يحاربوا فينا حبنا
وخوفنا دايماً علي بعضنا
فاكرين في يوم غدرهم
هيهزنا. هيهز شعرة مننا
كل ده بقى منطقى وطبيعي جداً
واللي عمره ماكان طبيعي
ولا منطقي اننا
يأثر فينا جرحنا وحزننا
.. يبعدنا يوم عن بعضنا
مسلم مسيحي يعني ايه
يعني جندي جمب جندي
في الميدان
شايلين روحهم علي كفهم
حالفين يصونوا عرضهم وارضهم
يعني دم واتخلط في المعركة
دم مرقص. دم مينا .
مع دم طه في ارض سينا
يعني شاب مسيحي شهم
يحمي عرض بنت بلده المسلمة
يعني شاب مسلم يدافع
باستماته عن ماريا
المنطقي والطبيعي عندنا
اننا دايماً حبايب
مهما حاولوا يروعونا
ويرهبونا
الطبيعي والمنطقي
ان الايدين تتمسك اكتر بالايدين
وان الهلال ويا الصليب يتشبكوا
وان عشان مصر تعيش
ممكن نموت
وفي قلبنا ضحكة بصوت
يموت كام واحد مننا
ولانسمح يوم مصر تموت
مصر باقية رغم كيدهم
طول مافيها صوت الاذان
وجرس الكنيسة في نفس المكان
طول مادايماً الفرح واحد
والحزن واحد والدم والجرح والعرض واحد
يبقي المنطقي والطبيعي يفكروا
ازاي يقدروا يهزمونا يبعدونا
يفرقونا يفجرونا ويشتتونا
بعلي صوتي واقول لهم
ارحمونا من قذارة عقولكم
من غل ومرض قلوبكم
وارحموا نفسكم
عمر يوم ماهتقدروا تفرقونا
هناء محمود ...ام عبير
إرسال تعليق