{{ المشهـــــــد }} بقلـــــم الشاعر محمود فرج

المشهد منقول من البيت
قدامي سيجارتي وولاعتي
وانا قاعد مركون علي الحيط
في الحتة اللي بسميها بتعتي
فنجان القهوة كان فاضي
عاوز اكتب كام فكرة جديده
وقلمي كان رافض مش راضي
ولعت سجارة في سجارة
فكرت اكتب بعروض
ولا اكتب احساس بمهاره
وانا قاعد بسمع في منير
احساس بصراحة خطير
كام كلمة استهوتني في جملة
وانا خايف اكتب استاذي
يحسسني ان انا عامل عملة
دخاني بيطير في الجو
راح عامل كام حرف ولو
احساسي موصلش للناس
الدنيا عمرها ما هتحلو
وركنت دماغي ع الحيط
علقت سيجارتي في صباعي
ومسكت كراستي وبصيت
انا هكتب بالفكر الواعي
وندهت هاتو قهوة يالي في البيت
وكتبت قصيده وسمتها
(((المشهد)))
بصراحة بجد انا حبتها
معرفش جمهوري هيرفض
ولا هيشهد
انها افكاري وجواها حكاياتي واسراري
واخذت قصيدتي ومشيت ع القصر
وزعت عليهم كام نسخه
وخليت وياياي الاصل
قدام استاذي وكأني
تلميذ خيبان في الفصل
راح قلي عندك كام كسرة
وعروضك فيها ضمة وكسره
وحاجات مش فاهم فيها حاجة
ورجعت ونفسي فيها كسره
ونشرت قصيدتي علي الفيس
اعجاب لايكات تهيس بالكوم
اجي انام يقولوا لي لا قوم
اكتب لنا احساسك تاني
وصلنا باحساسك لاحلي معاني
ودخلت صفحة استاذي
لاقتني علي الفيس استاذ وهو التلميذ
انا عندي شهادات بالكوم جمهور لايكات
اعجاب وحجات الآفات
وهو قصيدة عليها ٣ لايكات
من ناس عواجيز
عمالة تحكي في حكايات
مفهوم المشهد في الاخر احساس
الناس مش كسره وعروض ومقاس