{{ يمكن أكون ببعد ساعات }} بقلم إبراهيم بدر عبدالله

يمكن أكون ببعد ساعات
أو أنسى روحى ف السكات
يمكن يروح مني الكلام
والقى النهار صاحبه ظلام
لكن قلبي ف يوم م مات
بسمع حكاوي المجروحين
والقى الدموع جايبة الحنين
حتى الهوى ينسى الأنين
والفجر يختفي ف الصاجات
وساعات بشوف أيام تمر
والعمر ليه محتاج لعمر ؟
الصبر داب وعايزله صبر
تهرب حياتنا في الممات
وبشوف صبية رايحة جاية
بغفل تقوم تنده عليا
عاملالي م الأشواق دي غية
أصل الصبية دنيا فانية
مش هيا دي ست البنات
بحلم أطير فوق السحاب
والقى دوا لقلبي اللي داب
ليه حلمنا بيكون سراب ؟
ليه حلمنا يبقى انفلات ؟