قصيده للشاعر سلام ياسين
..........................
أنـا أسـف وسامـحيـنـي
ــــــــــــــــــــــــــ
قلبى اللى شاب منك قسم الجسد نصين
مع انه منغير روح برضوا اتخلق من طين
عاكس وبيعاكس احساسى بالتكوين
حاسس كأنه اتنين ومش حاسيين بأى حكايه حسيتها
يا اكثر حاجه بكرهها واكثر بنت حبيتها
واكثر كدبه بنفيها واكبر كدبه بثبتها
واكبر اه بتوجعنى واجمل روح بتسمعنى
وايه يعنى ...
مادام احساس وبيجمعنى عليكى انتى
يااجمل غربه حصلتلى
ياوطنى وبيتى ومدينتى
اقول ايه بس!
اكيد الشرخ جوايا مايتشفش انما يتحس
حقيقى انا وانتى كنا اتنين نبان حبيبين
ف عز ماكنا بنعافر وروحك فيا بتسافر
تلم الفرحه من فيا تعيش فيا
ثوانى ..... !! دا انتى مش هيا !!
مش انتى الروح اللى حبيتها
ولا انتى البنت اللى خبيتها سنين فيا عشان ترجع متعرفنيش
كأنى كاسه مرميه ف اخر النيش
فتاتة عيش لطير مبطون على الفته
انا اللى زرعت احساس الغرام فيكى طرح اته
ومستنيكى عشان اكمل تجينى ناقصه مية حته !
نصك جسد خاوى نصك وطن محتل
الكون ميزانه اختل
وانا برضو مش ليكى
بمد اديا مهما امد مابطولكيش
تمدى الخطوه قدامى لكن برضوا مابتعديش
واتارى المشهد الاول بيتكرر ميتين مره ف قلب افيش
كأن العمر كان مشهد وكان جمهور وخلفيه ونور وبتاع
حضور الكل بالاجماع على المسرح وفجأه الكدر يتحرك
يجيب روحى وانا وروحى بنتفرج
حفظنا القصة من بابها لحد ماشاب كلام الشعر ف غيابك
حروفى الدايبه على بابك بتتعلق بقشايه
.. اخاف اغرق ياعمرى وانتى جوايا
فسامحينى..
دموعى النازله من عينك بتكوينى
دمايه البايته ف وريدك بتحيينى
دليلى ان تهت من ايدك يتوه منى
واحس كأنى مش عايش لكن عايش بعيد عنى
فسامحينى
اكيد انا كنت واد طايش
وكنت فلاتى واد سكرى مايتحبش
بيكتب شعر م الغجرى اللى مش مفهوم
لكنى بعوم ف سحر عنيكى وبضبش
مسيرى اوصل ولو مااوصلش!!
مافيش بعدك حاجات انا ممكن اخسرها
واخاف وارجع عشان ما اخسرش
مافيش غيرك حاجات معكوسه جوايا ماتتكررش
يفوت العمر ف مرايا يفتتنى
لحد ف ليله مالقتنى ضحية فكرة المسافات
بشوفك عكس بعض حاجات
بشوفك ضي مايضويش غير وانا معاكى
واعيشك لما كنت بعيش على لقاكى
يا احلى مفيش سكن فيا قسمنى اتنين
قصايدى وروحى وعنيا معاكى وقالوا مش راجعين
سنينى وعمرى قدامى لكن ايامى مش حاسيين
كأنك حب لحظه وبس
وصلت اللحظه بعديها رافض اى شئ يتحس
كرهتك فيا خبيتك
لقيتك حضن مايضمش
فحبيتك
بعدتى بعدت
تعبت عاندت احساسى فحسيتك
كتبت كتبتى بحروفى
بخوفك خوفت من خوفى
ياخوفى لو تشوفى ازاى جرحتينى
مع ذلك .. انا اسف !!
وسامحينى ..
إرسال تعليق