{{ لف بالتنور دور }} بقلم فوزى اسماعيل

لف بالتنورة دور
جمع العمر ف ثواني
هات حياة بين القصور
من حياة بره المباني
نسمة فايتة ع الجسور
بالربيع وملوناني
لف هات م العتمة نور
حقق الحلم اللي جاني
اني فوق موج البحور
برسم الروح بالمعاني
رغم عيشتي ف السطور
لسه كلمة مدوخاني
ارجع الاسد الجسور
هاتلي حقي من زماني
بتسطل من طرف حور
ما اتسطلش م الاواني
جوه قلبي ارض بور جيتي
خضرتي كياني
اتزرع و احصد بذور
اتولد وبشكل تاني
ع البيوت انا مش هدور
طالما قلبك اواني
يتولد مني الشعور
ارجع اكتب سطر تاني
تو و يباركوا الحضور
بالرسايل و التهاني
يمتلك قلبي الغرور
تيجي انتي منبهاني
تمنعي نفسك شهور
تيجي وتمشي ف ثواني
انتبه الاقيني اثور
لسه برضه مجنناني
تمتلك سحر المرور
انتفض انا من مكاني
ارجع اقعد جنب سور
ليه حبيبتي مغلباني
جاية بصواني النذور
ماشية برضو مجوعاني
تنشري للدنيا نور
وانتي لسه معتماني
مهما عليا تجور
ليها حبي و امتناني
وزعي عليهم اجور
مش مهم مشحتاني
بس تيجي نفسي ازور
نفسي اعلن عن حناني
عقلي مش مدرك امور
كنت بدركها بجناني
خلي هم الليل يغور
حركي قلمي و بناني
اللي ببني لهم قصور
خرجوني من بيباني
افتحي الشباك بفور
الكلام خاصم لساني
ليه اطق كما الصقور
و انتي كنتي مدلعاني
انتي برضو من الطيور
بس لسه مهجراني
ليه رضيتي اكون كسور
و انتي كنتي مكملاني
وقفيني ف الطابور
رجعيني الصف تاني
ما بيشغلني الظهور
اعلم اني لابد فاني
بس يشغلني العبور
جوه منك عمر تاني