البعد الثالث
الرؤية مختلفة جدا
مسافات بتقرب بوضوح
غمض عينك
هتشوف بخلايا الروح
الحب الصادق مجروح
الألم المحسوس جواني
الحلم ينازع مدبوح
علي سطر كياني
الليل يتجسد ف ثواني
علي هيئة بحر
و سفينة تقرب من روحك
تلمس اشلائك و تعدي
علي كهف تراب
كان اخر خيط للنور عندي
و لقيته سراب
انتبه مفيش مدينة فاضلة
احترس كل القوافي مضللة
اقتبس من نور غريق
ارسم الحلم الجريء
إوعاك يا قلبي تصدقه
و ماترسموش بحبر جاف
ممكن تخاف
و خوفك أنت هيحرقه
خليه هوامش مبهجة
لون لنفسك الف بيت
و بلاش اماني مزعجة
دفيت بشعرك كل بيت
و مشاعرك انت متلجة
مع احترامي للجميع
انا مش هابيع
كراسة الرسم
اللي كانت قبلتي
وقت الزهق
و اعلن عليكوا محبتي
الحب اغلي من الورق
فوزي اسماعيل
إرسال تعليق