وفيه مخنوق لكن لابِس لتوب فرحان.. وفيه فرحان وكاتم فرحتُه م الخوف.. وفيه خايف كما العاده عشان إنسان.. وفيه إنسان وقاتل حلمُه قطر ظروف.. وفيه ممنوع يبان ف الصوره أصلُه فقير.. وفيه لازم يكون مِتشاف لأنُه وزير.. وفيه مواسير وعايش فيها ناس بالكوم.. وفيه طراطير لكن ساكنين ف قصر كبير.. هااخلِّي حروفي تتكلم ومن غير صوت.. قصيدتي الليله رح تدخُل ف قلب بيوت.. وقادر أخُش جوه الصعب وقت ماأعوز.. ووسطيكم أنا قاعد كجِد عجوز.. تحبوا تشوفوا وسط كلامي حدوتَة؟ لبنوتَة؟ لإنسان طافح الكوتَة؟ أخينا بجد كان تَـعـبان.. وكان شَبعان برغم الجوع.. وكان ف الدنيا دي متهان.. وكان أغلب كلامه دموع.. كِتافُـه لغيـرُه سـقَّــالَـه.. دا عاشها سنين وكان كالترس ف الأله.. مع وجودُه تدور مواتـير.. تصُب الشهد لجل الغيـر.. وهو حزين.. وعاش العمر متمرمَط بيطفح طين.. ومات مديون .. ورحمه ونور عليه العدل وسط الكون.. مفيش ف الدنيا دي إنصاف.. وفيه إلطاف.. دي كانت لابسه روب شفاف.. وكانت ليها قلب جريئ.. ومش بتخاف.. وكات رقاصه بتوزع لحوم ببلاش.. وكانت جوه سوق العِـفَّـه ماتسواش.. وكانت لابسه عُقدين ماس.. وكانوا هديه من واحد ملوهش أساس.. وكانت راضيه وبتنباس.. أنا أسف علي قولي بشكل صريح.. لكنُّه صحيح.. نخُش ونحكي تاني ف إيه؟ دا كوم مواضيع.. وأنا سايب لإلهامي يسوق أفكاري زي قَطيع.. دا فيه أطفال تحارب خوفها بحجاره.. وفيه أطفال بيسرَح جوعها بشكاره.. وياخساره.. علي عيان علاجُه مجاش.. علي الدنيا اللي ما تسواش.. وفيه خُفاش .. وماصص كل دم الناس.. وقولنا بإنه واحد كان ملوهش أساس.. لكن موجود إله ف عُـلاه.. وكِيف مايقول كتاب الله هانمشي وراه.. وقال الله.. بإن علينا ياجدعان رقيب وعتيد.. وإن النار لظلم الناس عذابها شديد.. وعاوزه مزيد.
إرسال تعليق