GuidePedia
رسمت الجنه ف عنيكي
وبمسك نفسي بإديكي
بتحميني _ و _ بحميكي
وببنيكي
ولو بيكي
يموت حلمي
ولا يهمك
انا فداكي
وكل ما املك
م انا امنك وانا املك
وانا فرحك وانا قلمك
انا علمك
وانا علمك
وانا عدلك وانا ظلمك
وانا صوتك ومن دمك
ومن لونك
انا عونك
بفضل الله
ف وقت الكرب والشدة
انا معاكي
ومش ح تخلى يوم عنك
ورغم انك
ظلمتيني
سجنتيني بقميص يوسف
وبعتيني
خدعتيني
سحرتيني
وانا صابر على سنيني
وبتألم
وبتعلم
وبتكلم
معاكي وبس
ومين غيرك بخوفي يحس
بجوعي يحس
مافيش ولا حد فى الدنيا
بديلك ايه !
مافيش منك
واحساسك هرب منك
نسيتي الفقر والزحمه
رقصتي ع الإزاز حافيه
يادي الكافية
وبالعافية وبالقسمه
نصيبي اعيشك الفرحه
برغم الدمع عنوانك
انا اللى ما عمره يوم هانك ولا باعك ولا خانك
انا اللى شربت احزانك
وبتحمل
عشان خاطرك
ومش هسكت ولا خايف
انا شايف
ورود بتموت
وحلم الحب حريه
لكن عاجز
عشان حبك
قدر مكتوب على جبيني
مابيني وبينك الكلمه
ببرهان الحياه والموت
انا موجود
بفضل الله فى دستورك
برغم الغربه
عن أمري
ورغم الحيره يا عمري
والهامي
يا بسمه لكل ايامي
نسجت حروفي من خوفي
ومن يأسي
وأحلامي أقول ليكي
" كرامتي_وحلمي_ف_اديكي "
و
دااا
حقي
Top
إرسال تعليق