{{ شيئ مابينا هاينكسر }} بقلم الشاعر رضا أبو الغيط

م البرد ايدى مخشبه
مش قادره تمسك بالقلم
وف عقلى حبة كركبه
صعب ان اسيبها تنظلم

ولعت ف المنقد خشب
دخانه كان ليه العجب
طاير ف قاعة عُمرنا
عامل كده زى السُحب
طالع بيترقص على
عرشى اللى دايب م المطر
من طاقه كات ف المندره
هرب الدخان فوق الشجر
ودفست كنكنه ف ولعتى
من بعد م الفكر اترسم
من شمعه قدت لمبتى
وبدأت احسس ع القلم
وصيته يكتب من سكات
عن ماضى كات فيه البنات
عواطفها داخل قلبها
محبوسه وليوم الممات
والفرق بينا وبين زمان
رغم المكان هو المكان
وسألته فين راح فرحنا
فقالى ..طار ويا الدخان
ولقيت كلامى شخبطه
وايديا رجعت ترتعش
م البرد.... او م اللغبطه
فقلت لازم انتعش
شديت بإيدى مشنتى
كات ف انتظارى م الفطار
ومعاها جبنه زعلتى
وقرن فلفل ..حامى نار
وبدأت اسرح ف البشر
وف زوجه فاتت عِشها
ليه القلوب صبحت حجر
والبنت مش زى أمها
وقبل قلبى ما ينحسر
على شيئ ما بينا ها ينكسر
لقيتها جايه وف خجل
بتقول.. دارينا م المطر
الود بينا ها يتصل
ونعيش سوا على عهدنا
ما هو صعب عنك انفصل
وف بطنى منك حلمنا
وبلمسه منها ع الحيطان
عادت لبيتى الكهربا
وف حضن مليان بالحنان
عادتلى أيام الصبا
وكتبت تانى بالقلم
سهل الحياه تضحكلنا
لو يوم ها نشعر بالندم
أو إعترفنا بذنبنا