منظر
؛-----------------------
؛-----------------------
متتغرش في شكلي يا صاحبي
والله دانا منظر
ومستنظر ملاك الموت
علي يفوت
ما بين اللحظة والتانية
وهو العمر إيه يعني
سوى ثانية ورا ثانية
ومهما يطول
دي دنيا مسيرها يوم فانية
لا تستاهل نعيش في صراع
ولا الأوجاع
على قلوب البشر تكتر
* * *
بلاش تاخدني بالظاهر
دانا بالضحكة باتظاهر
عشان الدمعة متفرش
ومتقرش
بأوجاعي
مافيش داعي
ولا الدنيا دي تستاهل
وبكرة الروح
تروح عند اللي خالقها
ويترد التراب لتراب
بأسباب أو بدون أسباب
ونصبح ذكرى .... ينسونا
ويفضل بس تأثيرنا
ف حياة غيرنا
وتفكيرنا
وكلمة حق قلناها
وخطوة على طريق الخير
مشيناها
وحلم كبير
بكل الخير لكل الناس
ورفع الراس ...
في وش الظلم مهما يكون
عشان الحق يوم يظهر
ندوًر بس ع الجوهر
وما نجريش ورا المظهر
ماتتغرش بشكلي يا صاحبي
والله دانا ...
منظر
؛-----------------
العزب فتحي
؛-----------------
العزب فتحي
إرسال تعليق