يازمن بقلم أ/رضا ابو الغيط

خف تُقلك يازمن
قلبى مش ناقص محن
وكفايه تكسير الضلوع
ده الفرح جوايا انسجن

الآه وساكنه ليل نهار
والدمعه عايشه ف انكسار
ما بين وبين قلبى الحزين
وف إيدى كاسى م المرار
ما تقولى ايه قصدك بقى
وامتى ها يكون اللقا
خبيت علينا الفرح فين
يا أبو الزوايا الضيقه
خف الألم ويا الجراح
مش لاقى لحظات ارتياح
بعلن مبادره يازمن
يبقى ما بينا اليوم سماح
ها أبعد عن الناس كلها
ها أفوت حياتى وظلمها
ما هو صعب جدا يازمن
أضحى تانى ف حُبها
صعب القلوب تنزف دموع
ع اللى اختفى من غير رجوع
وصعب وسط الموج أعيش
من غير سفينه بدون قلوع
خلاص خلاص بطلت خوف
وقريت كمان كل الحروف
مش راح أسلم للهموم
ولا حتى تمنعنى الظروف
ها أبدأ خلاص أنا رحلتى
وأمسح بإيدى دمعتى
أوعى أشوفك يا محن
لو مره تانى ف سكتى
كلمات / رضا أبو الغيط