والناس دِى بتِطْلَع مَلاعِيِن
نِدِّيهُم قيمَه وإحْساس
والآخِر يطلَعوا قاسيِيِن
وانا عن نَفسى صادِفت كتِييييير
مِ الناس دُوُلا يا مُحْتَرَمين
وخصوصاً بَعْض القُرَّاء
واللى بَقالنا سنين وسنين
نِكْتِب ليهُم مُش ب قَلَمنا
ولا بأحْبارنا ((( دا بالشَرايِيِن)))
كُنَّا بنِسْهَر طُوُل الليل
نِتْمَلْمِل لجْل انّ بيتين
يطْلَعوا مِنَّا يعالجوا قَضِيَّه
ف صورِة شِعْر ب وَزْن رَصِين
وكتير عَلَّقوا بالإعْجاب
والنَشْر ف بعض الجَرانِين
لكن لَمَّا يمُرّ الكاتِب
بالمِحْنَه ويتْسَرَق الفِيِس
أو يحْصَل لُه مُصيبَه تأجِّل
نَشْرُه لشِعْرُه ان شالله يومين
مافِيش مِنْهُم حَدّ يقول لُه
سَلامتَك أو يسْأل راح فِيِن
هُوَّا دا فيسنا العَرَبِى يا سادَه
وهُوَّا دا طَبْع الشَرْقِيِّين
عارِف بانّ كَلامِىِ بيجْرَح
ناس مَعْروفَه لناس بالعين
لكن هُوَّا دا أصْل الواقِع
واللى كتير مِنِّكوا عارفِيِن
بانُّه حَقيقِىِ وبنعيش فيه
لكن عاملين مُش شايفين
إرسال تعليق