( حبة صبر محوج )
_____
رجلي خدتني
لحد القهوه في نص الليل
ماشي بشوف تفاصيل الشارع بالمجان
رجلي خدتني لغاية أول ليلة شوق /
على باب مقفول
كنت ساعتها يدوب بتنفس حلم جديد
أول مره اعد نجوم الليل بإرادتي
أول مره اغير كل عوايدي عشانك
واما وصلت لحد النجمه الأولى وضيك ••
كنت سرحت في ضلة ساعتها وزحمه ووعد
هو ازاي على قد القرب الهجر رفيق
رجلي خدتني لحد وعودك
واما تعبت
سحبت الكرسي وخدت الناصيه الأولى تمام
فقت يدوب على صوت بيقولي هتشرب إيه
أشرب إيه ؟ اشرب ايه ؟
شارب يابني الغلب لحد طلوع الروح
بس اقولك
هاتلي قزازه عمر بسرعه أحسن عطشان
هاتلي كمان كوبايه يدوب على قد الحلم
وصب الذكرى لكل وجود مبقاش
مبقاش في البال
يمكن مره اجرب أصاحب حزني البايخ فيها واعيش
اصل تعبت كتير من كتر اللف
ورحت وقالوا كتير و مفيش
ولا اقولك
عاوز حبة صبر محوّج
بس تهدي النار وبراحتك مش مستعجل
لسه بقيلي محطه يدوب اركب لليل قطر التفكير
بص عليا الواد واتلبّك
عمره يدوب حاجه وعشرين
جابلي قزازه ميه وقالي ياخال واستاء
اصعب لحظه تمر عليك
اول ماتطل ف عين مشتاق
كنت ساعتها بالم سجايري
وباخد نفسي الضايع مني/
معرفش منين خدني الليل وداني ازاي
بس اقولك
هشرب شاي
بقلمي ( احمد هلال )
إرسال تعليق