دعوة .. تعالوا معايا نلف في الحارة شوية
...........................................................
.................. منظر خارجي ..................
...........................................................
منظر خارجي عالناصيه والحاره فاتحه حضنها
والبت في البلكونه ، بتنشر غسيل لامها
وشباب على القهوه ، شافوها وعليت الصفافير
وحسين بتاع الفطير ، شايفها زي المها
رمينا زهر الطاوله ، ونادينا ع المشاريب
بركات واخدله مقاوله ، وبليه واد كسيب
وعم فكري معدي ، بينادي ع العسليه
تعالي يام هنيه ، ونادي لام شعيب
ونصه واد عفريت ، زي الحمار الحصاوى
في الورشه متعاص زيت ، عاشق وغاوي
ساب المدرسه إكمنه ، مغصوب يساعد ابوه
شايف بعينه أخوه ، من فقره بقى حاوي
وابو النضر مجذوب ، في الحاره رايح جي
لو حدفوه بالطوب ، يزعق يقول لك حي
وعم هادي ينادي ، يجروا العيال في الحال
لابس عبايه وشال ، والعمه مالهاش زي
الفجل ورور مندي مغسول بإيد صبحيه
ماتشيل ياسيدنا ل افندي نفعها ع الصبحيه
البنت رايحه المدرسه عايزه لها كام لحلوح
أبوها مش بحبوح ، ولاعنده نقديه
نفس العيال مفتوحه على فلفلايه وفول
وجنب منها ملوحه ، يبقى الغدا معقول
نحبس بقى بخمسينه من عند عمي نجاتي
نشربها عنده يوماتي ، يبقى المزاج معدول
واسمع لعمي مجاهد ، دوانا لما يهل
دايما يناجي الواحد ، ويطول دعاه الكل
دكانه لم الزباين ، والمكوه سخنه ياخال
يكوي الهدوم في الحال صنايعي زي الفل
ونادى صوت الآدان ، كل اللي في الشارع
سيبنا اللي في الدكان وجرينا ع الجامع
ع الميضه واتوضينا ، صلينا سنه وفرض
في الحاره صونا العرض دام الوفا جامع
...........................................................
بقلمي الفلاح الفصيح
معوض حلمي
منشأة بطاش
تمي الأمديد
دقهلية
إرسال تعليق