معوض حلمي شاعر عامية
مربعات الفلاح الفصيح
................................
...... الكل شاحن ......
...............................
مغرور ع بالو ماراحل
زي الوحوش الضواري
في القبر نقبو دا راحل
تلعن خطاه الحواري
غروره هى ماديماشي
كفنها .. يستر .. (بلانا)١
وماشيه هى ماوقفاشي
توصل مسيرها (بلانا)٢
صاحبك تأمنه يغشك
ويهد .. بايدو .. بناك
نقي الطيابه لعشك
تلقاه .. بروحه .. بناك
خليك من الغل خالي
وإياك تعاتب وتهري
ماتقولش عمي وخالي
ولا أخ يسند ف ضهري
الدنيا دايره ومتاهه
غناها .. أكبر .. ( بليه)٣
سبحانه ربي دحاها
ماشاغله عندي (باليه)٤
هاتحب روحك ومالوا
لو مالوا عنك دا كيفهم
وان حسوا حبك (ومالوا)٥
إفتح بيبانك لاطفهم
متكونش كالصخر دانك
ولا تبقى .. لين .. زياده
خليك موارب بيبانك
والضحكه خليها عاده
أربط .. لسانك .. وصر
وخلي .. عقدك .. متينه
هاتعيشها غالي وحر
ولا دمعه تنزل حزينه
الرحمه لو تبقى (شانك)٦
هتلاقي أمنك في عشك
الكبر لو زاد (وشانك)٧
أصغرها واحد يهشك
سيب اللي يطمع يشيل
وقول له طيب ومالوا
لملم في عرقك وشيل
دا المال بركته ف حلالو
بيبني .. فيها .. لخرابها
بيوت ويكنز في ماسو
خيبان بيملى ف جرابها
غشاه .. وواكله.. ميراثو
الرزق مش قصر عالي
ولا هو كتر القرايب
الرزق في الضر غالي
بعد الحليب يجي رايب
سعيدنا هو اللي عاش
نضيف عيالوا ومالوا
دا الجنه فيها المعاش
ولا فيها قلنا وقالوا
إياك .. عيونك .. تزوغ
تسيب لولدك مهانه
يداري .. وشه .. يزوغ
م الخلق ويخاف إهانه
دا الكل راكب حصانه
دا الكل شاحن ريموتو
دا الكل سانن سنانه
دا الكل رايح لموتو
..............................
بقلمي الفلاح الفصيح
معوض حلمي
منشأة بطاش
تمي الأمديد
دقهلية
١..عيوبنا ٢ .. من غيرنا
٣..بلوه ٤ .. بالي ٥.. عادوا
٦.. عنوانك .. ٧ .. عابك
إرسال تعليق