زمن الديابه
من ديوان / ولسه بحلم بفجر
للشاعر / مصطفى فريد
برغم المسافة وطول البعاد
ورغم اختلاف اللون والعقيدة
باحس انى منك
وباشعر بانى حزين لما اسكت
واغمض عنيه
وادفن دماغى فى قلب الرماد
وشايفك يا صاحبى بتنباع رخيص
فى سوق العبيد
نخاسك اخوك
بيتاجر فى همك وقوت الولاد
بيشرب فى دمك ولحمك مزاد
مباح للى يدفع فى لحم الاسير
جنيه أو دولار
وارضك عمار
ولسه انت داير تمد الإيدين
وخيرك لغيرك
وعرق الجبين
بيصرخ بشده وينده عليك
تذأب يا صاحبى
وفوق من منامك
قوم اركب حصانك
دوس فوق خصامك
عض بسنانك فى كل خلافاتك
غير مكانك مابين الجيران
ما عادش فى زمانا مكان للصغار
زماننا ياصاحبى
زمان المصالح وعصر الكبار
إرسال تعليق