في عز نأحة بؤونة
... ..............
في عز نأحة بؤونة وقت تأيلتي '
نفضت تراب الكسل وشمرت عن ساعدي '
وخرجت انا وحدي '
راجل بقى مصري '
لابرد يهزني ولا حر يهمني '
لوني بشرتي قمحي '
وشعري اسود غطيس '
أخشن من الدريس '
لابس هدوم الشقى معتمد على ربي '
وفأسي زميل الشقى شايله على كتفي '
في ايدي اليمين غلق والتانية شرشرتي '
معاي غداي شايله في سيلتي '
كم رغيف طري وجبنه من الجرة '
وعود سرير سجاري وخيارة فلاحي '
أهي لقمة على الأد كده تشد مئلاعي '
وان ذاد علي العطش أهي الترعة قدامي '
بشرب وبكرع وبشكر المولى '
مشيت وانا مشدود ' مشيت رجولة كده
مش ماشي بدلع '
وبقوله يا عاطي ارزقني لاولادي'
وبين اراضي الذرة مشيت وانا مبسوط '
وفوق شواشي الذرة ظهرتلي عصفورة وقفه تبحلقلي وعوزه تشكرني على الهمة والجدعنه'
من صغرنا اصحاب تملي على بعضنابنصبح وبنمسي '
الزرع اخضر بيضحك والطير عليه بيحوم '
والساقية شغالة بتسقي الاراضي البور '
الف سلام وتحية على الايد اللي عرقانة '
هناك في الارض بيعذق الحاج عبعاطي '
والواد سلامة اهو بيحرث على الواطي '
السلام عليكو يارجالة 'المولى ويانا '
شيدو حيلكو بقى دا الارض عطشانه '
عاوزين على المغربية نسقي الجنابية '
شديت من على العش كم عيدان قش '
وفتلتهم كالحبل وربطوا على وسطي '
وقلعت مداسي هناك تحت شجرة الجميز'
ونزلت فحت وعزق والفأس تجيب الفأس'
والارض بتضحكلي عاوزة تكافئني '
يارب اشوفك كده ياارض مخضرة '
وفيكي.عيدان القمح صفرا ذهبية '
بتبرق كغواشي دهب في ضوء شعاع الشمس،
يافرحتي بيكي وانت مروية '
بتملي قلبي سعادة وفرحة معدية '
المغربية حانت هسيبك انا شوية '
وهكون معاكي هنا من بعد فجرية '
ابذر تقاوي القمح يا حته من قلبي '
ياما شفت منك خير'
ياام الهنا كله يا ارض اجدادي '
وخير لاحفادي '
ريحة ترابك مسك '
كان أبويا ومن قبله جدودي'
بيرووا بعرقهم نبتات تقاويكي'
والله ياارض الهنا انا دايب في دباديبك '
ونغسي ابات هنا تحكي واحكيلك '
بس غصبن عني بقى الصحة بأت على الأد '
مت يلا بقى بنا يا حاج عبعاطي الليلة ضلمة كحل'
نمشي على مهلنا ونحكي كام حدوته '
عن الدنيا واحوالها وايه اللي غيرها '
................................................
"اسلام جندي"
................................................
إرسال تعليق