أنا واخد علي خاطري
ليه نسفوا رصيف قطري
يا أم الكحلة شداني
ويا أم الليل ممرمطني
علي برك بقيت واقف
وجوايا الأمل خايف
نجني هم وسخايف
ونار جشعك تشيطني
أهدونا في يوم عيدك
بلوي تلغي مواعيدك
لا فرحنا بتجديدك
ومنجلكم مقروطني
يا أم الكل يا بهية
نزلنا السوق لحرامية
وجنيهك ما عاد ليا
وحال حالك معيطني
شربنا كاسات أيوب
علي وهم وكان معطوب
بعتونا لحبة طوب
وبحر آلام مزروطني
قومي فوقي كفاية خراب
مدي الحضن للأحباب
دا ما حد منا عاب
فليه في الذل رمتوني
وأنا تايه علي نيلك
دمي زيت قناديلك
ليه راميه اللي بيشيلك
كورة الكل بيشوطني
بقيت لعبة في رجليهم
وأنا ضهري سند ليهم
ما حصوة ملح في عينيهم
تشوف فين وصل فقري
ساقينا حنانك طين
وراكبين الليالي أنين
لا عرفنا نهارك فين
ولا من الضيقة رحموني
أصرخ برضوا مش عاجب
أصبر برضوا ما ليش نايب
أسكت أبقي واد خايب
يبعوا هدومي يعروني
وحق ستنا الطاهرة
لأركب فقري ميت مهرة
وأزرع للأمل بكرة
وشمس نهار يعدوني
----------
أنا واخد علي خاطري
الشاعر محمد ضباشه
إرسال تعليق