((( ادعيلي يا أمي ))) _1_
إدعيلي يا أمي... بخاطرك...
بليلة غدر ما كان بالصدفة/ي
تكالبوا وتأمروا الأغراب والعربان
وحشدوا جيوش وأفتوا بالفتنة/ي
وتيجاهدوا فينا كفروا الأنسان
ادعيلي ياامي حربنا كذبة/ي
فتوة دجل بسم الدين والقرآن
رحت وتركتك ت رد هالفتنة/ي
لبيت ندى جدادي صالح وسلطان
هبوا ياجدي وحجوا بالكعبة/ ي
بحرم النبي بسورية كعبة الأديان
ادعيلي ياامي...شو اشتقت لحضنك
اشتقتلك وفرقتك والله مو سهلة/ي
قلبي انكوى من حرقة الهجران
مشتقلك ياأمي وكلني لهفة/ ي
لبوس إيديك وتلاقيني بالأحضان
مشتاق نام بتختي شي نتفة/ي
وتمسحي شعري بحنية وانا غفيان
ادعيلي ياامي كل مافت ع الغرفة/ ي
وقولي يارب تحفظوا وتحفظ الأوطان
ادعيلي ياامي غربتي صعبة/ي
خايف ماارجع شوفك ونام بردان
خايف ماارجع بعد هالغيبة/ي
ولاشوف ضيعتنا ودروب هالوديان
ولا نقعد سوا بفيات هالدلبة/ي
حد النبع ومن شغل الارض تعبان
ونتشارك الزوادة ونقسم اللقمة/ي
وصحتين ع قلبك يا ضنا جوعان
ادعيلي ياامي... ولربنا صلي
إذا مارجعت ولافرحتي بالخطبة/ي
ولا فرحوا أهل ضيعتنا والخلان
وهالصبية ع بيتك ماأجت كنة/ ي
ولا كان في زفة عرس ولا عرسان
إذا مارجعت يامي وصرت بالجنة/ي
مع رفاق سبقوني ع جنة الرضوان
وماكان في نعش ولا أجت جثة/ ي
ولا صارت جنازة ولا اندفن جثمان
ولا قبر ضمني ولا دفتني هالتربة/ي
وصرت صورة معلقة على الحيطان
ادعيلي وافتحي إيديك ولربنا صلي
ولا تبكي عليي وتزيدي هالأحزان
اطلبيلي ياأمي من ربنا الرحمة/ ي
وسامحيني منك بطلب الغفران
وبقلبك ادفنيني وقولي هالجملة/ي
هون قبر أبني والشاهدة والعنوان
بقلبي الوطن ..وفيه اندفن هالجثمان
هون تربتو.. وهون الشاهدة والعنوان
أحمد أحمد الرسام الصغير /سورية /طرطوس
1 / 6 / 2018
إرسال تعليق