الحب بلا امل
بقلم /
الشاعر جمال القياس
------------------
جوايا لوحه بتترسم رغم الاسى
ياشعاع امل
نوره واصل ماينطفيش
جوايا ضحكه بتتقسم رغم الجراح
على كل دمعه ماتخفيش
جوايا امل بيعافر دايما مسافر
فى حضن يأسى علشان يعيش
لسه شيلك جوه منى حب عمرى
وانت عايشه بتنكرينى
لسه حاسك حضن دافى
حضن نبضه من حنينى
رغم الوجع لسه فاردلك أدينى
مش بعاتبك مش بلومك
انا كل قصدى نتقاسم همومك
خدينى ايد تمسح دموعك
خلينى نبضه تسكن ضلوعك
لسه شايفك الحبيبه اللى دوبها الانتظار
لسه حاسك ساكنه فيه ساكنه قلبى
زى نبضى ليل نهار
لسه حلمك وحرف اسمك منقوش عالجدار
لسه شوقى ولهفتى لما تغيبى عنى نور ونار
لسه صورتك لسه رسمك لسه بذرة حنينك
فى أرض روحى طارحه ذكرى بطعم الحصار
لسه شايفك بهيه ياصبيه بعيون ياسين
وانت مستنيه يرجعلك بعد غيبة السنين
لسه عايشك حبيبه وافيه فى قلوب العاشقين
لسه ضامم رمش عينى حاضن أدينى
يمكن تكونى محتاجه لحنينى
وانت هايمه فى دنيا واهمه
وكدبه عايمه والقصد تسبينى
------------------
الشاعر جمال القياس
إرسال تعليق