( انت القلب ) / بقلم الشاعر حسان الأمين

انت الكَلب ..( انت القلب )..بالشعبي

هاك كل الكَلب
وانطيني نصه
نص الي عندك
هايم بيك
و العندي بيك نصه
الكَلب كَلبي
و انت النبض
لو و كَف نبضي
تجيني غَصّه
يعني ربع
يكفيني عايش بيه
لو اركض على المغذي
واخذلي حصه
بس انت سالم
و وفي وياي
وما اريد
كل يوم تتبدل القصه
اريد عشكَي بيك يدوم
وما اريد العذول
يجي الدربي
ويكَصه
محبس ذهب يهواي
وأشمحلاه
بس الحلو الي بي
هو انت فصه
حبي الك
حب الكَاع للماي
لا لا
حبي الك احلى قصه
انكتب بيها اشعار
و اتغنوا و ركصوا
و شكثر حلَّوة الركَصه
انطي من حبك
فسحة امل
انطيني فرصه
أتراصف بالحچي
مراصف
ومن تجي يمي
و تكَاطعني
الحالي ترصه
خايف اخالف هواك
ويلزمني قاضي الغرام
وياخذ الرخصه
بس الك
كل شي مرخوص
حتى الزعل
ولو حتى العمر ضاع
سجن وياك
ابد ما اقبل اخلصه
حسان ألأمين