قولو لعبلة بقلم الشاعر / حمدي الليثي

قولو لعبله
ــــــــــــــــــــ
قولو لعبله عنتر حىّ
عنده مشاغل ومهوش جىّ
فاتح مصنع سلق بطاطا
ناوى يوسع قلى وشىّ
فاكره مسيرتى للنعمان
لسا بقوله ادينى النوق
قالى ياعنتر خف جنان
والله مافيه مصاريف السوق
واما فشلت فى ديك الحيله
قلت ابيع ترمس وبليله
فين ايام الخاله عديله
الله يرحمها كانت ذوق
قمت حاولت اسافر بره
قالو لازملك كشف وفيش
لا وكمان النيله المره
فين تاشيرة صقر قريش
والله ياعبله دى اول مرّه
اعرف ايه جزمه وورنيش
فاكره شقاوتى مع شيبوب
فاكره اللعب مع الجيران
الايام دى ازاى هتعود
بعد هجوم الامريكان
بت ياعبله يهود هوليود
كتفو عنتر ل سوبرمان
بس انا ناوى يابت ياعبله
اعمل حاجه احسن م النبله
ابدر ارض البور بالغلّه واملى القله
وازرع شط الغاب بالفلّه
وابعت ليكى جواب وتجينى وتعاونينى
نخرج من حواديتنا الهبله
نخرج من اوضاعنا الهامله
نخلق نهضه كامله وشامله
..شمس وتشرق من اراضينا
احنا ياعبله

حمدى الليثى