( بدون تصريح )
__________________
أنا وانتي وش وضهر
فمش ممكن هانتقابل
ولايمكن هانتبادل
لقا العاشقين
لأنك وصفه خياليه
بيقولوا عليكي إنسيه
وكمان بيقولوا جنيه
وانا اللي صانعكي
م الأوهام
وكتبت الشعر بالإلهام
ويجي الوحي من طيفك
نقول دواوين
وتيجي الكلمه مقسومه
مابين قلبين
ومين ياحبيبتي زيي صريح
كتبت حروفي بالقوه
تصد بعزم ميت نوه
عشان تشفي
قلوب مجاريح
وانا راكب بساط الريح
من داخل حدود قلبي
لحد عنيكي
واول خطوه في حدودك
حسيت بأني دبيح
فسامحيني
أنا جايلك بدون تصريح
وسايب رزقي لعنيكي
ياتيجي النظره ترويني
ياتيجي سهامها ترميني
واطب جريح
أنا والحب ياحبيبتي
من زمان أنتيم
وأول كلمه تجمعنا
كتبنا حروفها بدموعنا
ومن روحنا
في هوا بلطيم
وانا في الحب
مش لعبي
أنا يمكن أكون شعبي
وحبي كمان شعبي
ماهوش بالشوكه والسكين
مادام الفكره من ضيك
قوام طله
هاقولهالك
واعيدهالك
200 مره
أنا صادق في إحساسي
وبين ناسي
مكانتي عزيز
أنا فاهم أصول الدرس
مانيش تلميذ
وكلمه ف سرك إنتي وبس
جوايا حاجات تتحس
شايلها ف قلبي
ع الفاضي
مادام قلبك القاضي
أنا راضي بأيها حكم
ولو جاني
ومش هالجأ لأي محامي
ولااستئناف
لأني باخاف
يضيع في عنيكى عنواني
يضيع في عنيكى عنواني
__________________
بقلمي الفلاح الفصيح
معوض حلمي
منشأة بطاش
تمي الأمديد
دقهلية
إرسال تعليق