فراق
-----------
بعد ما كان بينّا حبّة اشتياق ..
الفراق فكّرنا ليه بالكبرياء !؟
ليه بنقتل روحنا ونعادي الحنين !؟
ليه بنكره بعض مع اول فراق !!؟
كنّا قصّة حب تتحوّل كتاب
كنّا واحد بس مش مكتوب نكون
النصيب اقوى بمراحل م العتاب ..
والعتاب وقت الفراق محتاج قانون !!!
والقانون احنا اللّي دايماً نكسره
واحنا بنكابر نقول ماكسرنهوش
كل واحد له حبيب راح يخسره
كل واحد له حبيب هايقول مالوش !!!
الفراق خلّانا نقوى ونترسم
والقلوب م الغيره بتولّع شياط
نرمي روحنا ف حضن تاني ونبتسم ..
بس فيه جوّانا بحر من العياط !!
اللّي سابه حبيبه فجأه راجعله تاني ..
جي يترجّاه بغابه من الورود
مايجازفش ويملى روحه بالأماني ..
وقبل مايكمّل ياريت يكتب عقود !!
اللّي يحلف اوعوا حد يصدقه ..
ياما ناس حلفم وعادي اتفرّقوا
اللي حبّك سيبله باب قلبك موارب ..
اللي حبّك اولى م اللّي بتعشقه !!
اللًي عايز يبقا فيه حد ف حياته ..
يبقا قادر ع الحكايه واللي فيها
و اللّي يبعد يبقا ياخد ذكرياته ..
مش هايبعد عنّا ويعذبنا بيها !!!
------------------------
-------------
إرسال تعليق