أنا من بختي
-----------------
انا من بختى ان انت معايا
ساكن كل حروف الشعر
كل كلامك عاش جوايا
واستناه بفروغ الصبر
قولى يا شاعر
ليه انا حاير
ليه فى الشعر بغيب بالشهر
يمكن شعرى يكون بلا قافيه
او يمكن بكتب بالعافيه
او يمكن عايش فى الغفله
انا كان شعرى زمان شخابيط
كنت زمان برسم ع الحيط
كنت كتير بسرح فى الماضى
حتى كلامى كان ع الفاضى
واما بقينا فى عز الحاضر
قلت انا لازم ابقى حويط
وابعد حبة عن التخبيط
بلاها كياسه .. بلاها سياسه
هابدا اكتب شعر عبيط
كنا زمان عايشين على لمبه
كان فى لمبه اسمها وناسه
كنا نحب فى عز العتمه
وكان الاصل بيعرف ناسه
اما الحاضر ! جايز ممكن
ان يكون ملعوب فى اساسه
ليه الحاضر كله كلام
ليه عايشين فيه ع الاحلام
كله وعود وكلام اوهام
يمكن جايز العيب فينا
او يمكن نحس فى اسامينا
او لازم تتغمى عينينا
والثابت اننا بلا قافيه
عايشين فى بلدنا وبالعافيه
......
»« طلعت عامر »«
---------------------------
إرسال تعليق