رغم العذاب لا خيانة للوطن:
الصراحة أنا عشْتْ
من صغري لكبري
فوطني معذب
و عمّري ما كرهتو
واخا تقسم ظهري
و بلعني فقري
وطني فدمي يجري
و باقي ليه كا نحب
شفت الويل و صبرت
و عمري ما خنتو
و لا ليه آ نخون
على جمار الهم عبرت
و باقي ليه نصون
جربت آلام الجوع
و غرّْقْت الأرض بدموع
و ظليت فحياتي مفتون
و باقي راسي مرفوع
لوطني قدت الشموع
به أنا مسكون
قالوا لي بلا حرام
عمرك ما توصل
انت عايش أوهام
بلا مال تعيش فالذل
نسمع الشيطان فالمنام
يقول عندو الحل
راه الوطن غير تراب
و خيانتو ما تقتل
فكرك غير سراب
من فقرك غادي تمل
نرد ببسمة تشرق
بضمير لروحي يقود
وطني ما نخون
ما نشد رشوة
و ما نسرق
واخا نصير مفقود
يا وطني فيوم يبان
لي دمو سال فأرضك
و ديما ليك را صان
و لِّي بَاعْكْ و خان
و ضْيّْع شرفك و عرضك
فعذابي نار بركان
و علي راك ما تهون
يا أعز الأوطان
يا أرض الكرم و الجود
كِّيمَّا صنتك آ تْصونّي
فيوم الحق يعود٠
٠٠٠٠٠٠٠٠٠٠٠٠٠٠٠٠٠٠٠٠٠من توقيع/المهدي العمري٠
إرسال تعليق