ريحة زمان
************
مُشتَاق لريحة زمان
لِطَبلِّيَة بلدي تِجمَعنَا
ولَمبَة فَلاحِي نُورهَا جَامعنَا
وقَعدِة حَصِير
شَايلانَا صُغيَّر كِبير
وأُختي جَايِبَة بَراد شاي
وأنا مَاسِك ْالصِينَيَّة وراها جَاي
تِدِّي الصُغَيَر قبل الكبير
مُشتَاق لريحة زمان
مًشتَاق لضحكي للعبي
أجري أشَاكِل أعمل مَشَاكِل
ما هو كان جِنَانْ
مُشتَاق لجَريي حَافي
ف الشوارع
تِحَلَّق عَلَيَّا بِنت الجِيرَان
مِحلاها عيشة زمان
لما أتعب واحدة ريفو
تخليني حُصَان
مُشتَاق لريحة زمان
لرُبع ورق
يجيبلي 10 طوفي
وبنصه داخل جمعية كمان
مَحلاها عيشة الغِيطَانْ
لما أبويا يشمَّر يزقِي الحِيضَانْ
وأنا مِشمَّر زَيو تِمام
ولما يتعَب أفتحلو صُرة
فيها قوطة مع جبنة بلدي
نِغَمِّز سَوا برُغْفَانْ
والله مَحلاها عيشة الغِيطَانْ
غُرَاب يقوق وصَقر يغقغق
وأنا صحبي أبو قردان
مُشتاق لريحة زمان
مُشتاق لناسها الجدعان
اللي يقطع نخلته حتى الجريد
يهادي بيه الجيران
يلا سلام يا ريحة زمان
والله حبيت ويَّاكي الكلام
*************************
كلمات / زكريا ضاحي توفيق
إرسال تعليق