قصيدة / بعد السلام ( القصيدة التى ابكتني عند كتابتها )
*****************
للشاعر المصري / احمد ابراهيم
**************************
بعد السلام
يا بهيه ازيّ ابويه والعيال
وامى واختي
والله يا اختى الحمل زاد
فوق كتافي وشعري شاب
كنت سامع انى ابويه بحال صعيب
وامي محنّي ظهرها
والسنين وبيا تجري بتقلها
والحمل ذاد
لسه عايش جوه غربة
والكفيل بيذيد عناد
واخد شقايه بيصرفوا ويقولّي هات
وادفع سكات دمعة اهات
على خد غربة مؤلمه
يا بهيه داير ف السواقي بدمعتي
جسدى النحيل عرق الجبين
مشتاق اضمك يا بهيه
اضم ابويه وامي واختي
والواد محمد والبنات
باعت لبويه فلوس علاج
قولّي لامي لسه فاكر
ظهرها اللى محنّي بكبرها
هبعت انا باقي العلاج
طمنيني ع العيال طمنيني يا بهيه
نفس اضم البنت صابحه ونفس اضمك
نفسي ابوس خد البنات
ووحشني خدك
ايوه حاسس رغم غربه كتير بهمك
ايوة عارف كل حملّك
رغم كل الدمع فى ورقة جواب
والسطور مبلولين م الدموع
ايوة حاسس بالصعاب
بس دخلي شئ زهيد
والكفيل ماصص وريد
دمى اللى قرب ينتهي
ده انا ظهري قرب يتحنّي
اهوال كتير والشعر شاب
عايش وانا زي العبيد
صابر وانا بين الالم
باكي فى ليل صعب وعنيد
وكليتي جفّت وجع
وقالوا انى مش هاعيش غير كام سنه
هفضل هنا
ابعت لبويه كسوته وعلاج كمان
اموت انا ولا يوم تجوعي يا بهيه
ولا العيال سلميلي يا بهيه علي كل البلد
ع السواقي والنجوع على كل طفل اتولد
وبوسي خد ابويه بوسي
وامي واختى والواد محمد والبنات
سمحيني يا ام العيال سمحيني يا ام العيال
**********************************
بقلم الشاعر المصري / احمد ابراهيم
إرسال تعليق