اِمْسَحِي دَمْعِة عِنِيكِي / بقلم الشاعر أحمد شاهين

اِمْسَحِي دَمْعِة عِنِيكِي
ـــــــــــــــــــــــــــــــ
اِمْسَحِي دَمْعِة عِنِيكِي
اِنْتِي فِي القَلْبِ مَكَانِك
اِنْفُضِي يللا اِيدِيكِي
مِين يَا أُمِّي دَه اللي هَانِك
صَحِّي تَانِي الضِّحْكَه فِيكِي
قَلْبِي إتْعَذِّب عَشَانِك
دَه احْنَا رَافْعِين رَاسْنَا بِيكِي
نِتْبَاهَى بِيكِي وِبْزَمَانِك
دَه نْقُول عَلَى الدُّنْيَا السَّلاَم
لَو مَا حَد فِينَا صَانِك
أصْل الشَّهَامَه مُش كَلاَم
وَلاَ إنِّي اسِيبِك فِي مَكَانِك
مَغْضُوب عَلِيه فِي الكِتَاب
اللي يِسْتَجْرِي يِبِيعِك
وِاللُّوم عَلِيه وِالعِتَاب
دِي وَصِيِّة النَّبِي شَفِيْعِك
كُلِّنَا يَا امَّا وِلاَدِك
كُلِّنَا عَايزِين رِضَاكِي
اِرْفَعِي رَاسِك يَا أُمِّي
كُلِّنَا وَالله فِدَاكِي
دَه انْتِي قوَّه مِن حَدِيد
دَمِّك يَا أُمِّي هُوَّا دَمِّي
أبُوس ايدِيكِي وِالوَرِيد
اِرْفَعِي رَاسِك يَا أُمِّي
اِرْمِي حمُولِك هَاتِي عَلَيَّا
هَاتِي هَمِّك جَنْب هَمِّي
هَتْشِيل عَنِّك كِتَافِي
هَتْشِيل عَنِّك إيدَيَّا
وِانْتِي لِلطِّيبَه وِضُمِّي
اِنْسِي كُل جَرْح عَدَّى
وِكُل دَمْعَه عَ المِخَدَّه
بَدِّلِيهُم بِابْتِسَامَه
وِعَ الأحْزَان خَلِّيكِي سَادَّه
دَه انْتِي لِلجَنَّه عَلاَمَه
أُمَّك ثُم أُمَّك ثُم أُمَّك
وِبْدَعْوَه مِنِّك
تِتْفَك العُقْدَه اللي شَادَّه
اِنْتِي رَحْمَه لِلزَّمَان
اِنْتِي اِكْسِير الحَيَاه
اِنْتِي مِسْك لِلمَكَان
بَعْدِك يَا أُمِّي مَافِيش حَيَاه
ــــــــــــــــــــــــــــــــــــــــــ
كلمات الشاعر أحمد شاهين
----- مصر - أسيوط -----