بركان
جمود فى عقلِك الباطِن
فى حالةْ حب منسية
بتسمح للقلوب تسرح
وتحجز قلب مش لىَّ
حدود راسية على أرضى
ف دايرةْ طول وملهية
ف سرقة اسم خط العرض
وعايشه الدور بعصبية
بتحلف بالسما السابعة
وقادرة تلف بيا الكون
وعاشقة م القلوب سبعة
وبتنافس جميلةْ الكون
وناسية نفسها وسامعة
آهات عيشاها مستمعة
بتحمى ف نار مهيش قايدة
وشاغلة نفسها بيا
وكاتبة م الديوان ملايين
قصايده كلها فيا
حروفها تهد اى كيان
وقافية موقفانى عريان
ووزن موسيقى مش لايق
وقافلة طلعتنى جبان
وذل وكسرة ف عينيا
وقبل صدور اى ديوان
هقولِك عنى أغنية
بنكهة طفل كان عريان
وعنده م الهدوم 100
ف ليله كنت انا البركان
وكنتى لى حمايم نار
بطفّيها بروح انسان
تزيد نارِك بغشومية
ما هِدِّيتْ مرة ولا ثانية
ولارِجَّعِتْ ف حضن زمان
ولاعِشِّقِتْ ف يوم غيرى
ولا خَبَّت عليا حنان
ولا عِصِّيِتْ عليا ف يوم
وكان نفسِك ف 100بركان
وحياتك منى والىَّ
جاية ترجعى لى زمان
وتحكى ف قصة منسية
وتغرينى بكوم أوهام
وفاكرة هتفضحى عينيا
دا يوم ما تنشرى بس ديوان
هتحنِّى ل 100 بركان فيا
بقلم "محمد الخضرى "
إرسال تعليق