نسيج واحد ليوم الدين ...... شعر / م . محمد الجوجرى
جنب بيتى كنيسه وجامع
لا بينهم حواجز ولا موانع
و فى كل حاره وشارع
مسلم رايح ومسيحى راجع
شركا فى الألم والمواجع
ولبعضهم شارى وبايع
وزملا فى العمل والمصانع
وفى الفلاحه أسمهم زارع
الكل بُطرس ومحمد ونافع
ويد واحده فى العمل والمواقع
والحق بينهم ماهوش ضايع
معايه فى الشغل حنا وبُطرس
وابنى زميله فى الفصل جِرجس
وجَارى فى العماره بُطرس
فى أفراحى يبارك ويُرقص
ومراته تتزين لها وتلبس
وفى احزانى واقف ومُخلص
ولما الكنيسه اتفجرت
والدم سال والناس اتفرتكت
كانت الجُثث على بعضها
مسلم مسيحى سايحه فى دمها
مافَرقش الموت والدمار بينهم
ولاعرف كمان يميز دينهم
الكل شريك فى الوطن
وببيشربوا من مَيه واحده
وشركا فى الأرض والسكن
وعلى عدوهم نار قايده
وشركا فى الرخا والمِحن
ومهما فرقوهم مفيش فايده
لابينفع معاهم وقيعه ولافتن
نسيج واحد وأيادى مُتحده
محميه يامصر ومتحَصنه
ومحروسه من ربى ومتأمنه
ومرابطه بجيشك ليوم الدين
وشعبك بيدعى يارب آمين
إرسال تعليق