رسم الزمن علي جتتي
موصوف كمان حالي
طب ليه ف اخر دنيتي
القى كدا حالي
وانااللي كنت زمان
بتباه أنا بمالي
شباب وياما الشباب
من الفكر دا خالي
دلوقت بعد الشباب
والشيب أهو جالي
لابس هدوم الشقا
فرجه كمان للناس
والطوب بينزل مطر
بجري وانا محتاس
حتى عيال السكك
ضربوني بالمكناس
مارحمو يوم شيبتي
أستغفرك يارب
راضي أنا بحكمك
بس السؤال للبشر
مش دمي دا دمك
الرحمه راحت فين
بتقسى ولا همك
يمكن اكون لك اب
ولا أكون عمك
وعليا بتعايب وانتي
كمان زدتي
يا دي الزمان الردي
معدش حنيه
الكل عامل طناش
ولا يسألو فيا
حتى ضنايا أبن دمي
سبني بقاله سنين
راكب سفينة الحياه
ولا يسأل أنت فين
الحوجه صعبه أوي
ولا أنتو مش عارفين
بلبس ف توب مقطوع
مطبوع عليه بالطين
والوش كله هباب
مش وش بني أدمين
من كتر ظلم الزمن
راح مني والله العقل
لا هدمه تستر بدن
ولا بطن فيها الأكل
كترت عليا المحن
مايشيلها لوري ونقل
مكاني أي رصيف
لافيه حيطان ولا سقف
لا ستر من شمس صيف
ولا برد يوم بيخف
سلمت أمري اليه
يرحمني أنا الضعيف
بقلمي ( احمد هلال )
إرسال تعليق