خد بالك
@@@@@@@
وبقينا ف زمن التهليس
وحياتنا الخاصه علي الفيس
بنخش ونعرض مشاكلنا
وبنعرض واللحم رخيص
لو عايز ادخل واتفرج
ما تقولش اروبا ولا باريس
وسبقنا اروبا وامريكا
واتفرج شوف المهاويس
بالكاميرا يصور وينزل
ويبالغ قوي ف التزييف
لو واحد محتاج لعروسه
أو اسره ومحتاجه عريس
يتصور وينزل صورته
والآخر تقلب تدبيس
مبقولش دا عيب ولا حرام
ولا ماشي ضد التحديث
انا بس بقولك من فضلك
لو كنت محافظ وحريص
الفيس هيخرّج اسرارك
وهيدخل بيتك ابليس
هيطارد اختك وامراتك
ويلم عليك المتاعيس
وساعتها هتندم وتولول
والظن يزيد والتلبيس
وتشك ف اهلك وحبايبك
وتبالغ قوي ف التهييس
والبنت القعده ومش فاهمه
مربوطه بحبة تراويس
ما تقومي يا بنت انتي وذكري
لميتي عليك النسانيس
ياخسارتك ف العلم ياشطره
شوهتي الصوره علي الفيس
والآخر تقلب بعلاقه
وفؤاده غلبت عتريس
والست القعده علي الصفحه
ولا طبخه ف درها ولا كانيس
وساعات بتمر علي الحلوه
وغسلها مركون ف الكيس
تتجمل وتنعم صوتها
بطريقه تسحر ابليس
وان جوزها اتكلم تردحله
وتفك عليه المحابيس
وبسرعه يحب علي إيدها
ماهو بردك محتاج لونيس
الفيس حكاياته بقيت نيله
والدنيا قلبت تهلييس
يقلبلك راسك ونفوخك
وتخش ف وسط المهاويس
انا بس بقولك خد بالك
لوكنت علي النت حديث
النت يعلم ويثقف
ويضيّع لو كان قديس
النت يسلي المدايق
ويواسي المحتاج ل أنيس
النت يقرب مسفات
ويعرّف خالد بخميس
وزمايل ف الشغل معانا
ونهني ف شهر الفوانيس
وتبادل خبرات ومصالح
ومهم كتير ف التدريس
فوائد أخري مفيش مانع
لو تتطلب صورة رمسيس
انا بس بقولك خد بالك
واتجنب شلة ابليس
@@@@@@@@@
بقلم /////// طه إبراهيم
27 / 2 / 2017
إرسال تعليق