الحب متفصل عليك
إحساس غريب ؛
لما بشوفك كل حاجة ف دنيتى ؛
بلقاك غريب
وقت اما اكون باتمنى حضنك ؛
وشئ عجيب
إنى ساعتها
بيبقى نفسى انك تدوب ف محبتي
أو ع الاقل ... ألاقى منك ضحكتك ؛
بلقاك حبيب
حتى لما تكون زعلت
ولما تنزل دمعتك
بتزيد ف قلبى محبتك ؛
وبطير معاك وسط الحياة
والدنيا مش قادرة تجارينا ف الهوى
ولا سهام الحب قادرة تكسرك
حتى انشرخ سقف السما
لما لقانا يوم لُقانا مجروحين
وكأنه مستني ابتسامتك تنقذه
راحت السما تصلح ما بينا
وابتدت تدعى النجوم
وتنادى على ضي القمر
فتلاقى نوره فيه غيوم
وجه شعاع الشمس
وضيه متحني بهموم
كل الكواكب فى تمرد
لاجل ما تشوف ضحكتك ؛
وانا الوحيد اللى عاجبنى قمصتك ؛
بتزيد ف قلبى كل انواع الشجن
اللى ليلاتى بشوفها سارحة ف نظرتك
أصلك حبيبى وروحى فيك بتونسك
بوصل معاك إنى تملّى أتنفَسَك ؛
بحلف بروحى إن عشقك جوة روحى
حاجة بتطيب جروحى
وف حروفي بشوفها فيك
عايزك تملى تكون حزين
والدمعة ما تفارق عنيك
يبقى الزعل عنوان حياتك
وتخاصمنى وأموت عليك
عايزك تشوفنى تروح مبوز
تلقى بوسة بين عينيك
دا الحب عمره ما كان جديد
الحب متفصل عليك
أنا قلبى بيحب الساعات
اللى بتجمع قلبى بيك
وف لحظة تيجى تضمنى
وتهد أحزانى ف عينيك
بقلم "محمد الخضرى "
إرسال تعليق