{{ ياعم يابتاع الكلام }} كلمات الشاعر جهاد بدر

يا عم يا بتاع الكلام
ما بقاش كلامك يتسِمع
ماشى تحلل فى الحرام
و عايشها دُنيا بتتوجع

بتقولى تعبانه الأهات
بتقولى فين الأمنيات
بتقولى حارب دمعتك
خليها فى دموع البنات
خليها صرخه للصغار
أو للكبار وسط الدمار
أو طفل مبتور الإيدين
بين الألم وسط الحصار
خلى دموعك مشنقه
للى يعارض كلمتك
أنا قلبى جوا الشرنقه
حاول تغنى بلهجتك
لون على كل الحيطان
إقتل سنابل بالعيدان
إهتف و نادى ع الجهاد
احصد و كسر فى البيبان
و كأنى مكتوبلى أكون
بين البشر وسط الكابوس
و انت تحرض بالكلام
و احنا على زنادك ندوس
اليُتم أصبح بالحياه
و العُهر جاوز مُنتهاه
بالعجز نشجب أو ندين
و الغيم ما جابت عين مداه
أحمد ينادى ماتسمعوش
مينا بدمعه ماترحموش
و كأن دم الناس رخيص
و الفُجر عينك ماتشوفوش
خدعوك يا هذا بالكلام
و بقيت جبان بين الظلام
و بقيت خسيس و انا باسألك
كام ذنب بإيدين الغُلام
مين اللى شايل ذنب اخوه
حامى الحمى ما هاينفعك
مين اللى خانكم بتخونوه
مين اللى ناره ف مضجعك
فى القبر إيه رد السؤال
بالفُجر قول مين فجّرك
فى الأخره جاوب ع السؤال
و قول لربك يسمعك
و كل دم الناس هناك
وسط الدموع وسط الألم
و كمان دموعك يا وطن
حرقوا الشجر حرقوا العلم
جوا ضلوع اللى قتل
بس بضلوعى بنيت أمل
و المادنه نادت ع الفلاح
و اجراس كنايس ع العمل
جوا ضلوعى بنيت أمل
و المادنه نادت ع الفلاح
و اجراس كنايس ع العمل