..(( يا بهية حلمك عليا ))..بقلم // ...د/عمر عبد الجواد عبد العزيز

.....(( يا بهية حلمك عليا )).....
يابهيه حلمك عليا.....
الزمن غدار و الدنيا نار
و انا في الساقية دوار
وانتي آسية عليا.....؟؟؟؟.
المرتب فص ملح وداب
مابين أكل و نقل و شراب
حتي جزمتي من غير شراب
و الهم فاض بيا...........؟؟؟.
السكر في شكاير علي بعضها
متخزن بإٔدين تستاهل قطعها
والرقابة عامية وعلي أدها ....
والناس هتاكل بعضها ......
وانتي مش حاسة بيا......
يا بهية صبرك شوية......؟؟.؟
دا الجنيه ما عاد يُسر
في المصرف عوموه
و بقت حالته تُمر........
لا عارف أعيش بيه
ولا قادر منك أفر........
الأسعار من الإحتكار بتزيد
و المرتب محلك سر....؟؟؟.
يا بهية فين الحنية .....
القلب ليه جاحد عنيد
والناس علي نار بتقيد
بنستغل ديماََ بعضنا
والرحمة راحت من قلبنا
ولا حد سائل عننا......
وإنتي طايحة فيا....
يا بهية أنا في حبك بدوب
و راضي معاكي بالمكتوب......
إنما في الصبر مش أيوب
في فرحك ناسياني
وفي جرحك أنا المطلوب
والكيل طفح والدمع مالي عنيا..
انا في وادي وإنتي ياما في وادي
و حاميكي من قدري هو جلادي
عليا بيأسي ولحالي بينسي
و طالت فترة حدادي ....
حلمك يا بهية عليا.......
و بكفاية.....ظلم و قهر و أسية......

د/عمر عبد الجواد عبد العزيز