دومية صينى
قالت لى
كل ما تقابلنى مرة
تجيب سيرتها ؟
إنت جاى تشوف حبيبتك
ولا جاى توصفها لىّ !
إنت لسه زى ما إنت
بتحامى لها ؟
وبكلمة حلوة صغيرة
تضحك علىّ !
كل شوية تطلع لى
بحجة شكل ؟
يبقى كل الحب ليها
وتقولى بتغير علىّ !
تبقى واخدة
منى كل حاجة
وكل ليلة ف حضنها
وأما تيجى تزعلك
أخدك ف حضنى
وتشكى لىّ !
تبقى عندى كل حاجة
وتتهمنى بالأسية !
ساعات كتير
ف عز حضنك
بحس إنك مشتاق لها !
وإنى عندك لعبة ساذجة
دومية صينى مُسليِة
أرجع وأقول
دا حب عُمرِك قبلها
مهما غاب
أخرتها برده هو لىّ
يا حبيبتى
يا كل حاجة ف دنيتى
إدينى فرصة
أحكى فيها قصتى
ظلمتى قلبى بدون دليل
إنتِ جيتى كتير علىّ
إنتِ عارفة إنى
مستغناش عنك ثوانى
وإن قلبى مش مساعى
حد تانى
والأسية اللى ف كلامك
بتصعب الدنيا علىّ
إنتِ حاجة
وهى حاجة تانية خالص
إنتِ نبض قلب عارف
يعنى أيه يعشق حبيب
إنتِ روح لقلب واقف
لو توهتى منه يغيب
إنتِ أم للحبيب
إنتِ منبع الحنية
مش لما بزعل
بتقولى لى إنت إبنى
ولما بتعب
بتقولى لى أسكن ف حضنى
مش هو دة برده كلامك
إنك أم عايشة فىّ
وإنى مزروع جوة منك
و إنى حتة من جنانك
وإنك عايشة جوة عينى
وإنك واخدة منى ننى
وجاية ترمى اللوم علىّ
مش لما ببقى عايز أحلم
بتقولى بص ف عينيا
ولما أبكى بتبكى قبلى
ودموعك تملى عينيا
مش ساعات كتير تقولى
يا إبن عمرى
إنت حبلى سرى للحياة
يا إبن قلبى
إنت بالنسبة لى طوق نجاة
يا ابن حضنى
إنت الهوية
إنتِ عارفة دلوقتى
نفسى ف أية
نفسى أبوس إيديكِ
وأحضنها ما بين إيديا
نفسى أبوسك وسط راسك
وأحقق لك أمنية
نفسى تفضلى ف حضنى
طول سنينى
وعنينكِ باصة لعينيا
يا حبيبتى
إنتِ أغلى حاجة عندى
وأتحمل الدنيا عشانِك
مهما قولتى ومهما عِدتى
إنتِ ثابته ف مكانك
وإن جيتى ف يوم بعدتى
يكفينى فارس أحلامِك
ولهفتِك كتير علىّ
بقلم"محمد الخضرى "
إرسال تعليق