رسالة حب
**********
لقيت فى كتاب
رسالة حب مهجورة
وورده حاضنة كام صورة
لناس عاشقين
صور بهتانه م الوحده
وهجر سنين
وورده بتشكى م القسوه
بصمت حزين
بتسأل
جف ليه الإحساس ؟
وإيه غير قلوب الناس ؟
وليه تايهين
عيون ف دموعها غرقانه
وعاشقه الناى
وصوت الضحك بقى صرخه
بطعم الآى
وفى سطور الرساله كلام
عن الحب اللى عاش ايام
ما كان الحب له معنى
وطعم ولون
بيوصف شوق ويتغنى
ويحلف قربه كان جنه
وبُعده جنون
مشاعر حب ممزوجه
بإحلى كلام
حروف نبضاتها تتحاكى
وتتعاتب مع الأيام
وفى الآخر أمل بلقاء
وفى الإمضاء
بقبلة حب مرسومه
آخرها سلام
كتب عاشق وكله هيام
وسابنى أحتار
نهاية القصة كات جنه ؟
وعاشها صاحبها وإتهنى ؟
وخوفى يكون كحلم جميل
بيتبخر بضى نهار
*********
محمد عبد المنصف
إرسال تعليق