إحتمال
====
إحتمال
أبنى ف عيونك آمال
وافرد الحلم اللى مال
وابتدى أعبر حدودك
واهزم الصعب المحال
إحتمال
يعترف قلبى اللى دابك
إنه عاشق نور شبابك
وانه مش طايل سحابك
بس متهنى ف رحابك
البعيد
بس أقرب م الخيال
إحتمال
نختلط وندوب ف روحنا
بس نفضل زى ماحنا
ننجرح نحضن سنينا
نطوى كل جراحنا بينا
حبه حبه ..سِنَّه سِنَّه
نكتشف ترياء جروحنا
تنفجر م العتمه طاقه
تحضن الجرح ب براءه
تنولد بينهم صداقه
طاهرة من غير أى ءانه
صافيه من غير افتعال
إحتمال
أبقى عاشق
تبقى عاشقه
أنسى كل الماضى فجأه
وابتسملك
واحدف الكلمه اللى عندى
بالعشم وبكل جرأه
تلقطيها
تحضنيها
واما اقولك ع اللى فيها
تسكتى سكوت الموافقه
قلبى يضحك بانفعال
إحتمال
الشتا مايزورش بابنا
والدفا يحضن شبابنا
والربيع الأخضرانى
يطرح الحب ف ثوانى
يومها ما نحسش بآهه
لما نجنى ثمار تعبنا
تطرح الحلام وراها
ضحكه خالصه من قلوبنا
طيبه زيك وزيى
نورها من ضيك وضيى
وان عطش غيطك لرىِّ
أروى بستانك بميِّ
واما نلقى الطرح نابنا
نقطف النرجس منابنا
يرجع الصيف اللى سابنا
والشتا مايروقله بال
إحتمال
..................#عمرو_عفيفى
إرسال تعليق