{{ شـــروق وغـــروب }} بقلم ابتسام عوض حسن

شروق الضحكة الفرحانه
اللي بتلمع قوي في سمانا
وتنادي على كل الدنيا
وتقولنا ممنوع لو ثانيه
اننا نحزن أو يحزن
مين كان ويانا
وغروب الدمعة اللي بتسكن
في قلوبنا تبقى وتتمكن
راح تخرج بره وتنسانا
شروق الحلم المداري
وصباح بينور ويلالي
ويقول يا مراحب بالدنيا
غروب اليأس اللي قاتلنا
وجارحانا سنينه وأسرنا
وفراق الضلمة اللي
في روحنا
شروق العمر المتغرب
وبرجوعه مش ممكن يهرب
ويعيد الطير
لحن غنانا
غروب الكلمة المحرومة
في بدايه ونهاية مظلومة
بتموت روحها وسامعانا
شروق وغروب
واملنا بيحبي يادوب
والجاي أحلى يا دنيانا