((انا مش يتيم))
ابويا راح قبل الصبا
فى جوار كريم
ياأهل القلوب الطيبه
انا مش يتيم
انا لسه سامع ضحكته
شايفه بيربط عمته
تسعه وتسعين حبه لولى
ملضومين فى سبحته
صوته بيجلجل فى المكان
ساعة اﻵدان
الكل يصحى للصلاه
الفجر حان
شايف عصايته معلقه
ع الحيط وراقده مبحلقه
شاهده على ادب زمان
عصايه تسوى مشنقه
بعدين تقولوا انى يتيم
انا مش يتيم
وحتى لو بقيت يتيم
يافرحتى
ياسعد عمرى ودنيتى
سيدنا النبى الهادى الكريم
لما اتولد
كان يتيم
انا مش يتيم اﻻ اذا
شفت القلوب متحجره
شفت النفوس متغيره
وناس بتطلع ع الكتاف
لجل يبقوا فى اﻻمام
يزيحونى بايديهم ورا
لو دا حصل
بقيت يتيم
لكنى لسه لوقتنا
مانيش يتيم
انا مش يتيم
"""""""""""""""""""""""""""":""""""""""""""
محمود ناصر
إرسال تعليق