بمناسبة مرور عام علي رحيل الخال
.....................................
جواب رقم 7
بعد الخال
.....................................
جوابات الاسطى حراجي القط
العامل في السد العالي
الي زوجتنا فاطمة أحمد عبد الغفار
الكاينه في جبلاية الفار
............................................
وصلنا جوابك
وشفت الفرحه
بتتنطط في وشوش عيالك
وكإني يافطاري
معاكم فرحان علشانك
راح اقولك حاجه
داريتها عليكي بقالها سنين
من يوم ما قربت ألقاكم
حسيت بالعيد
صحيح يافطاري
سنين غايب والقلب وحيد
طب اقولك شي تاني
لولا الجوابات رايحه وجايه
كنت أبقى غريب
مقطوع من شجرة
بدون عياييل
وزوجه وفيه
أكتر من وصف
حبيب ل حبيب
الشوق والغربه وقطر العمر
وطعم الخوف اصعب وأمر
الايد مشتاقه لضمه وحضن
والعين يافطاري راغيه دموع
قد ايه موجوع
ياااااااه كنت تملي بقول جوايا
مفيش حاجه أصعب م الجوع
ولقيت الشوق يافطاري دموع
اسخن من نار قايده أسبوع
حضرت أحوالي
وبنيت أوضتين
لعزيزه وعيد
و وضبت الاوضه اللي انا فيها
علشان انا وانتي نعيد ونزيد
ونعوض كل سنين الفرقه
بدون مواعيد
راح احط في كل غرفه سرير
سرير لعزيزه وسرير للواد
وانا وانتي سرير
كان ودي افرشلك
قصر حرير
والفقر ضرير
وفرشت الارض علي قدي
سجاد وحصير
وجبت كام كرسي وكنبه
وجوز بوابير
وحوالي 4 لمبة جاز
علشان الليل
راح اقيدهم لما النور يقطع
بكفايه ضليم
دلوقتي كافة شي جاهز
حتى المواعين
بس هاتي معاكي يافطاري
لبس العاييل
وان كان علي الهدمه وياكي
هاتي لبس قليل
أنا ناوي أكسيكم علي مزاجي
ما انا غبت كتير
حضري حالك وقوليلي
امتى المواعيد
من اول تذكرة القطر
لحد أخر قيد
أنا هدلى من الفجريه
استناكم في محطة أسوان
خلي بالك م العاييل
القطر متاهه ولامم ناس
من كل مكان
خليكي حافظه تدلي بس
بالعاييل في محطة قطر أسوان
وان كان وياكي حاجه يابتي
حرصي عليها وسط الزحمه
الحاجه بتتبخر كيف الدخان
شيعيلي جواب
قبل ما تخطي عتابة الدار
تقفي علي شباك الحجز
وتقولي عاوزه اروح اسوان
زوجك الاسطى حراجي
..................................
عصام دويدار
إرسال تعليق