{{ كلام طـــازه }} بقلم الشاعر رضا أبو الغيط

بلون الفرح متحني
ومتهني
بطعم الفرحه اللي سكناني
ليالي طوال
كلام عايش قريب مني
ومتغني
بدون الناي... وللا أحزان
وللا موال
كلام لونه
بلون الحب اللي جوايا
ونجمه عاليه ف سمايا
كلام كاتبه عشان يتقال
وتسمع به... بنات حوا
يمس القلب من جوه
تبات طارحه من الفرحه
شواشي جمال
كلام متقال بميت لهجه
بلون بهجه
بتتحزم بأجمل شال
نسجته بحرف ف كتابي
علي بابي
ومطرز بأحلي مقال
كلامي شهد ومكرر
كلام أحلي من السكر
كلامي حرفه متنقي
ومتغربل بميت غربال
كلام كاتبه ومتفسر
تشوفه الدنيا تتحسر
وتتكسر علي صخره
مع الأندال
وتسهر تاني علشاني
وتتمني أدلعها
وألقعها
هموم كابسه علي أنفاسها
وإحساسها
ومنعاها يروق البال
وتتمني يكون ليها
كلام كاتبه لناس فيها
كلام مكتوب ومن قلبي
لروح قلبي
كلام نابع من الاحساس
ما تتاقل حروفه بمال
كلام كاتبه علي حسابي
لنن العين اللي حاسه بي
بقول ليها ....ولعينيها
كلام الحب سهرني
كفايه دلال..................
********************

رضا أبو الغيط