{{أنا ولطيف }} بقلم محمد ضباشه

أنا ولطيف وحوار سخيف

عن حكومة مكشرة

تاركة الغلابة للظروف

وليهم يديها مقصرة

بتغرق سفن اللى تحت

وقصور حيتانها منورة

واليوم يعدى والسلام

بحاجات كتير متكسرة

والناس بتسأل إحنا فين؟

وليه حالتنا متدهورة ؟

والجوع بياكل في العيال

وأم العيال متشمرة

وعينيها حنفية دموع

بتبيع في باب المندرة

عشان رغيف

وأنا ولطيف

من الصبح بدري غرقانين

نتوه فى زحمة

ننزل فى طين

وما فى رحمة

مع كذابين

مع غشاشين

مع اللى بيمص جيوبنا

وما حد عارف

بتروح لمين ؟

لناس فوق مولفين؟

ولصفوة بينا مأنتخين ؟

ولا لجهل فى الدماغ ؟

ترك ليلنا يبات حزين

خايف نور الصبح يطلع

وأصواتنا تصرخ

نجيب منين

فين العدالة ياللى فوق

دى الثورة قامت من سنين

والطابور دايما يزيد

بشباب رافضة الأنين

واللى ساب الدمعة تنزل

تقتل جوانا الحنين

واللى ساخط

واللى ناقم

واللى فاقد الأمل

مع اللى معصوب العينين

ومش شايف الغلابة

بتاكلها ديابة سعرانين

دولاب الكلام شغال

والفعل نصيبه قليل

وقطار النفاق بيسير

على قضبان تهد الحيل

ويوم الحكومة بسنة

والحلم نهاره ليل

والكرامة توبها مرقع

ولسه طريقها طويل

لحد أمتى الصبر ؟

على الزفة والتطبيل

والناس تنداس بالجزم

من أي واطى عويل