[ وعد ومقسوم ]
مكتوب فى عشقك أدوب
وأسافر وبرضه عنك ما أتوب
يا ام طرحه وجلابية
عِشقك سباني
ورجعني لعصور الجاهلية
مش ناسى ساعة الفجرية
ولا صوت القمارى فالعصرية
وقعدة الشاى مع عيونك الملاغية
وإيد بتحفر وتزرع
وصوت السواقى
وضحكتك البهية
وعد ومقسوم
أعشق وأدوب
وعيوني لغيرك لعلمك
نظراتها مستحية
ومتحرمة والله يا بهية
يا ام طرحة وجلابية
مهما كان قلبك
حجر صوان
وسايقة على
ولادك الدلال
وخجل العذاري
وكهن النسوان
برضة أنتى الغالية
وهتفضلى غالية وعالية
مهما جار علينا الزمان
وأتغيرت
في ملامحك شكل الالوان
وحتي لو اتبدلت الاسامي
من حسين لعلوان
وحسان لدبور
وسلوكهم صار
مثل ذئاب الجبال
قالها ربى االمنان في القرآن
العيشة في حضنك أمان
وانا غاوي الأمان
وعشق الملاغية في عيونك
يا عالية المقام والمكان
شحات عثمان المحامى
في 2016/3/30م
إرسال تعليق