انت الخسران
يللي ودادك
خلا القلب يشب يقوم
وكان محروم
يللي ميعادك
خلا عنيا ما شافت نوم
من يجي كام يوم
فرحانه بترقص وتغني
عزف النني
علي وتر الحب وجنني
ما خاف اللوم
اخضرت ايامي عشانك
ورويت الورد ف بستانك
صبيت القهوه في فنجانك
واستنيتك من كام يوم
استنيتك تيجي ف ميعادك
تطفي نار الشوق في بعادك
ترش الملح ف عين حسادك
اتاريك ظالم مش مظلوم
خونت ودادي
خونت ميعادي
غلبت انادي
شمتوا اعادي
حواليا بتلف تحوم
قسيّت قلبك ليه علي قلبي
يللي وهبتك روحي وقلبي
قولي يا ظالم انا ايه ذنبي
آخد امرك
انزل بحرك
وانا في الاصل مليش في العوم
لو جيت في ميعادك
كنت فارشلك رمش عيوني
تخطي عليه
كنت واهبلك كاس من قلبي
تسكر بيه
كانت الشمس حتاخد جنب
مابيني وبينك
شمس عيونك
في سما جبينك
ولا يحجبها عني غيوم
انت الخسران
لما قسيت علي قلب هواك
انت الخسران
لما هجرت عيون عاشقاك
انت الخسران
لما لبست عبايه البايع
واللي يبيع الحب ويقسي
مش انسان
وعشان كدا انت الخسران
@@@@@@@@@@@@
محمود ناصر
إرسال تعليق