يارب بمحبتك للناس انا راضي
انت اللي بتحبيني و بحكمك انا راضي
بالصحبة دي جمعتيني و الجمع مش فاضي
اللي بيكم رابح ما تعبشي ع الفاضي
اهلي هنا و مكسبي و اصحاب و بتراضي
ان شاء الله حتي بلايك منكم انا راضي
يا مخاوي سن القلم يا حرف يا عفريت
يا مخففاتي الالم يا مظبط التظابيط
رجعني سن القلم قالي انكتب يا عبيط
الكلمة مولودة عندك و حداكي برضوا الفطام
متفطميش الرضيع فطم اليتامي حرام
يا مسرحة الدرويش ف قلبي بكرة صيام
ف حضرت الإلهام صوم المعاني حرام
يا مرقصة المجذوب علي ندهة ف الحضرة
بتدلعي المجذوب يكتب سطور خضره
يتمايل العشاق علي مدح من خضرة
و فوزي لما يقول الحلو جي منين من كوكب الزهرة
قوم يتفزع مجذوب و ينادي ع الطاهرة
يا مزغللين العينين يا مزوقين الحرف محتاج قلم قطرة
كل ما انقط كلمة التانية مش صابرة
يا مشفرة الاحساس فكيتي ليه الشفرة
ف الامتحان الجاية النمرة من عشرة
مش لازم اصاحب الف طب حتي قول عشرة
و يا خوفي بس الالف يصفي علي عشرة
يا محررة الملايين انا لسه ف الاسري
مجذوبك اللي يفوق بيدخلوه الصفرا
السر مش ف النور السر ف الوصلة
عشقك بيملا سطور من غير ولا فاصلة
يا محيرة المساكين واقفين علي عتابك
بتقولي امشي لمين ده انا قتيل بابك
داخل برجلي اليمين بس اقبلي جنابك
و ان حتي مقبلتيش درويش علي بابك
بس انتي مترضيش لإبن الاصول البرد
بس اتفقنا خلاص إن لقانا وعد
هتبدريني شوك برضوا هنبت ورد
طب ما انتي عارفاني اهبل و يكلوا عشاه
و انتي اللي قولتيلي طيبنا ربه معاه
إرسال تعليق